- Transaction entre Pierre Poyet et le chapelain de la Saulaye et Pierre Allard sieur de Beauregard pour l'accroissement du terrain nécessaire à la construction de l'hôtel, 22 février 1537 ancien style, 1538 n.s. (AD Maine-et-Loire : E 3680).
/1/ Sachent tous presens et advenir que comme despiecza noble homme et saige maistre Pierre Poyet seigneur des Granges /2/ conseiller et advocat pour le Roy nostre sire, et juge des traictes et imposicion foraine en ce pays d´Anjou, pour construire, bastir et ediffier de nouveau sa maison par luy nouvellement fait bastir, ediffier et construire, en la rue de la Jaille de ceste ville /3/ d´Angiers, et pour l´acroissement de la place d´icelle maison, et pour mieulx l´acommoder, ait eu desir et luy ait esté besoing avoir une maison et jardrins d´icelle qui lors estoit de la fondacion de la chappelle ou chappellenie de la Saullaye, fondée et deservie /4/ en l´eglise Sainct-Maurille de cestedicte ville d´Angiers. Laquelle maison et jardrins d´icelle estoient et sont encores a present joignant d´un cousté et abutant d´un bout et contiguz a ladicte maison dudict Poyet. A ceste cause, se seroit lors ledict Poyet addressé /5/ a deffunct maistre Jehan Vivier lors chappellain de ladicte chappelle ou chappellenie, et l´auroit prié luy bailler par vendicion ou autrement ladicte maison, estant de ladicte fondacion d´icelle chappelle. Lequel chappellain auroit accordé audict Poyet luy /6/ bailler icelle maison en luy en baillant une autre en cestedicte ville, et soit ainsi que de ce adverty, honneste personne sire Pierre Allard seigneur de Beauregard, marchant, demourant en ceste dicte ville d´Angiers, voullant et desirant ledict Allard faire /7/ plaisir audict Poyet, et pour recongnoissance et remuneracion d´aucuns grans et gros plaisirs gratuitez et agreables services, auparavant ce jour faictz par ledict Poyet audict Allard, et que ledict Allard esperoit que icelluy Poyet luy feroit a l´advenir, /8/ et pour ce que tres bien luy auroit pleu et plaisoit, auroit dès lors, icelluy Allard de son pur mouvement et de sa pure, franche et liberalle voulunté, donné, quicté, ceddé, delaissé et transporté audict Poyet qui auroit accepté pour luy, ses hoirs /9/ et aians cause, une maison o ses appartenances et deppendances, audict Allard appartenant comme il disoit, sise en la rue de present appellée la rue de la Poislerie de ceste dicte ville d´Angiers, joignant d´un cousté et abuctant d´un bout aux maisons de feu /10/ maistre Jehan Pelvon, et d´autre cousté aux maisons des heritiers feu Thibault Boyart et de René Martineau maistre barbier, abuctant d´autre bout au pavé de ladicte rue, pour d´icelle maison en faire et disposer ainsi que bon sembleroit a icelluy Poyet, /11/ à la charge seullement de paier, servir et continuer les devoirs et charges anciens et acoustumez, non exceddans la somme de quatre livres dix solz tournois et au moyen de ce, et que ledict Allard auroit lors promis bailler et consentir estre de ce faictes /12/ et baillées lectres vallables, ledict Poyet auroit baillé par eschange, audict feu Vivier chappellain susdict, ladicte maison par ledict Allard donnée audict Poyet comme dict est. Lequel Vivier, en contreschange, auroit baillé audict Poyet ladicte autre /13/ maison dessus declarée, sise en ladicte rue de la Jaille, ainsi que tout ce contenu est, es lectres de ce, faictes et passées soubz la court royal d´Angiers entre lesdicts Poyet et Vivier, par Michel Millard notaire d´icelle court, le quatorzeiesme jour de mars l´an mil cinq cens vingt-neuf, et a present requeroit et a requis ledict Poyet audict Allard, que au moyen de ce que dessus et suyvant sa dicte promesse, il eust a luy bailler ladicte seureté dudict don a luy faict par ledict Allard de ladicte maison dessus declarée, ce que /14/ ledict Allard liberallement a voullu et accordé comme cy-après s´ensuit. Pour ce est il que en la court du Roy nostre sire a Angiers, endroict par davant nous personnellement estably, ledict Pierre Allard, soubzmectant, luy, /15/ ses hoirs et aians cause avecques tous et chacuns, ses biens, meubles et immeubles presens et advenir quelz qu´ilz soient, ou povoir d´estroict ressort et juridicion de ladicte court quant a cest faict, confesse de son bon gré sans aucun pourforcement, les /16/ choses susdictes et chascune d´icelles estre vrayes, et que encores du jour d´huy en tant mestier seroit ou pourroit estre icelluy Pierre Allard, a donné, quicté, ceddé, delaissé et transporté, et par cesdictes presentes donne, quicte, cedde, delaisse et /17/ transporte dès maintenant et a present a tousiours mais perpetuellement par heritaige, audict Poyet a ce present et acceptant pour luy, ses hoirs et aians cause, ladicte maison dessus declarée et confrontée a la charge des devoirs et charges anciens et /18/ acoustumez comme dessus est dit seullement et en tant que mestier seroit ou pourroit estre ledict Allard a ratiffié et eu pour agreable et par cesdictes presentes, ratiffie et a pour agreable ledict contract d´eschange et contreschange fait entre ledict Poyet et feu /19/ Vivier ainsi que dessus selon la forme et teneur, et a esté et est ce fait pour les bons, grans et gros plaisirs, gratuitez et agreables services dès lors ainsi que dit est et depuis icelluy temps, faictz par lesdicts Poyet audict Allard en plusieurs [e]sdictes /21/ affaires, comme il a congneu et confessé par davant nous, et dont il s´est tenu a contant et pour ce que très bien a pleu et plaist a icelluy Allard, et dont et desquelles choses susdictes et chacunes d´icelles, lesdictes parties sont demeurées a ung /22/ et d´accord, et a tout ce, mesmes a ladicte [damaison?] tenir et acomplir sans jamais aller faire ne venir encontre par complaincte, opposicion ne autrement en aucune maniere, et ladicte maison ainsi donnée et transportée comme dict est /23/ garentir, saulver, delivrer et deffendre dudict Allard de ses hoirs et aians cause, audict Poyet, à ses hoirs et aians cause de tous troubles et empeschemens quelzconques nonobstant que donneur ou donneuresses ne soient de droict /24/ tenuz garentir ce qu´ilz donnent si ne leur plaist auquel droict et a tous autres et a toutes deffences et allegacions quelzconques a ce contraires. Ledict Allard a renoncé et renonce par ces presentes et sur ce garder ledict Poyet, ses hoirs et /25/ aians cause de tous dommaiges, oblige icelluy Allard, soy, ses hoirs et aians cause avecques tous et chacuns ses biens, meubles et immeubles presens et advenir quelz qu´ilz soient (?)et au droict [discret generalle] renonciacion non /26/ valloir et de tout ce que dessus est dit, tenir et acomplir sans jamais aller faire ne venir encontre en aucune maniere. Est tenu ledict Allard par les foy et serment de son corps, sur ce baillez en nostre main, jugé et condempné /27/ à sa requeste par le jugement et condempnation de ladicte court. Fait et passé Angiers es presences de honnorable homme maistre Françoys du Moulinet, licencié es loix, seigneur de la Bigotiere, honneste personne René Jolivet, marchant /28/ appoticaire et Ambrois de la Bonnetiere, demourans audict Angiers. Tesmoings a ce requis et appellez, le vingt-deuxiesme jour de fevrier l´an mil cinq cens trente et sept. Constat a tel ? Renonczant a toutes choses /29/ a ce contraires. Fait comme dessus.
Litige entre Caude Lantdévy, veuve de Pierre Poyet, et Marin Trigory, chapelain de la Saulaye, relatif à la nouvelle emprise de l'hôtel, 20 janvier, 1544 n.s. (AD Maine-et-Loire : E 3680).
/1/ Sur les discords, differens et proces pendans et indecis par davant le juge de la /2/ prevosté d´Angiers entre maistre Marin Trigory, chappellain de la chappelle ou chappellenie de la Saullaye deservye en l´eglise Sainct-Maurille d´Angiers, demandeur d´une part, et damoyselle /3/ Claude de Landevy, tant en son nom que comme tutrice naturelle des enffans myneurs [dans] dudict deffunct et d´elle deffenderesse d´autre part, touchant ce que ledict demandeur disoyt que ja couroyt /4/ que de l´anxienne fondacion de sadicte chappelle ou chappellenie fust une maison, jardrin et appartenances situez près la maison dudict deffunct Poyet sur la rue tirant du carreffour de la porte Girard /5/ au val de Mayne appellée la Jaille ou Cachebreton, joignant d´un costé et abuctant d´un bout ausdictes maisons dudict Poyet et d´autre costé aux maisons qui soulloient estre a Jehan Cornaveux /6/ parchemynier et au jardrin de Geoffroy Gallicher courayeur, et d´autre bout au pavé de ladicte rue de la Jaille, neanmoinlgs ledict deffunct Poyet s´en estoyt emparé et en saisine et y avoyt /7/ assis porcion de son corps de logis qu´il auroyt de nouvel faict fayre et ediffier, et partant demandoyt ledict chappellain que ladicte veufve faist condemnée en vuyder ses mains /8/ en partir la possession et saisine luy en rendre les fruictz et louaiges et y concluoyt et a despens et interestz ou de la part de ladicte veufve esdicts noms estoyt dict /9/ que ledict chappellain estoyt sans action et avoyt tort parce que despiecza y avoyt eu contract d´eschange et contreschange par lequel le chappellain de ladicte chappelle avoyt baillé /10/ audict deffunct Poyet ladictemaison et appartenances et en contreschange, ledict deffunct Poyet avoyt baillé une maison située sur la grant rue tirant du carroy /11/ de la porte Girard au pillory de ceste dicte ville d´Angiers, joignant d´un costé et abuctant d´un bout aux maisons de feu maistre Jehan Pelvon, d´autre cousté aux maisons des heritiers /12/ feu Thibault Boyart et de René Martyneau barbier, d´un bout au pavé de ladicte rue de la Poislerye ou fief de l´oppital anxien d´Angiers quelle maison valloyt de /13/ la moictié myeulx que ne valloient lors dudict contract, lesdictes choses par ledict chappellain ainsi baillées oudict eschange faisant (quelles choses ainsi par ledict Poyet baillées oudict eschange faisant ) (sic) auroyent esté indempnées par lesdicts /14/ de l´ospital en plain chappitre general ou par commissaires par luy commis sur ce commes soustenu [au commissaire ?] par ledict Trigory chappellain disant que lesdictes choses ainsi par ledict Poyet /15/ baillées estoient ruynées mesmes l´un des pignons de ladicte maison davantaige qu´il n´y avoyt latrynes et qui plus est ne advroient esté admortyes ne indempnées. Lesdictes /16/ partyes demeurant en ladicte ville d´Angiers, paroisse Sainct-Maurille, personnellement esdicts noms et quallitez establiz soubz la court royal d´Angiers avecques tous et chacuns leurs biens, meubles et /17/ immeubles presens et advenir, ont pour obvyer a proces transigé et accordé comme s´ensuyt, c´est à ssavoir que ladicte veufve a promys est et demeure tenue bailler et fournir /18/ de ratifficacion et emollogacion vallable dudict contract d´eschange et contreschange et indempnité d´icelluy desdicts de l´ospital anxien d´Angiers et en bailler lectres vallables audict /19/ chappellain dedans d´huy en deux ans prochainement venant o icelle indempnité fayre fayre deument si faict n´a esté, aussi sera et demeura tenue ladicte veufve esdicts noms faire faire et poyer /20/ les reparacions necessaires qu´il convient fayre a l´un des pignons de ladicte maison baillée audict chappellain par ledict feu Poyet par ledict eschange et contreschange /21/ et oultre ne quicter ledict chappellain de l´amortissement desdictes choses vers le Roy, touteffoys et quantes qu´il en sera inquieté ou ses successeurs chappellains de /22/ ladicte chappelle et baillera ladicte veufve quatre escuz soleil pour fayre des latrines en icelledicte maison baillée audict chappellain dont il en a poyé content deux escuz soleil /23/ et le reste le poyera ladicte veufve aux ouvriers quant ilz besongneront, et en ce faisant, sera et demeurera ledict contract d´eschange et contreschange /24/ faict entre ledict feu Poyet et ledict chappellain en sa force et vertu sans ce que ledict chappellain ne ses successeurs y puyssent desormays contrevenir en /25/ aulcune maniere tous proces nulz et assopiz du consentement desdictes parties et en deffault de fayre cesdictes choses et chacune d´icelle les presentes (par ladicte veufve) seront /26/ et demeurent nulles en luy rendant par ledict chappellain ce qu´elle aura baillé et faict par le moyen de ces presentes, auquel accord et choses /27/ dessus dictes, se sont lesdicts establyz obligez et obligent eulx, leurs hoirs, successeurs et aians cause, avecques tous et chacuns leurs biens et choses, meubles et /28/ immeubles presens et advenir quelz qu´ilz soient et s´entregarder sur ce de tous dommaiges o renonciacion a toutes choses ad ce contraires. Ce fut /29/ faict et passé audict Angiers en la maison de ladicte veufve es presences de maistres Pierre Duysseau et Catherin Gruyon, licencié es loix /30/ conseilz dudict chappellain estably Jehan Davoynes, Jehan Gallichon et Jehan Goussault, licenciés es loix tesmoins ad ce requis et appellez, le vigntiesme /31/ jour de janvier l´an mil cinq cens quarante-troys. Constat en rature : et en deffault de faire lesdictes choses et chacune d´icelles ces presentes seront et demeurent /32/ nulles en luy rendant par ledict chappellain ce, faict comme dessus. Constat en glose : quelles choses ainsi par ledict Poyet baillées oudict eschange faisant /33/ par ladicte veufve, faict comme dessus.
|
